228.0 歷史ài真實，國家ài健康
Hêng-tōng Soan-giân行動宣言
今á日咱同齊來chia，tī中華民國行政院頭前，beh siàu念咱台灣人ê亡靈、咱ê序大。77冬前，中華民國殖民政府台灣省行政長官公署就是tī chia，1947年2月28 到kah 5月16，中國國民黨政府軍隊看著台灣人民就開chhèng，四界烏白tōaⁿ，chē-chē人hō͘ in thâi–死、lia̍h–去、受鎮壓、hông「清鄉」，對Tâi-oân-lâng大屠殺。
今年228無koh變做連續假期，bē koh看著生理人放送廣告teh「慶祝」228。咱台灣人thèng好思考，228是怎樣會設和平紀念日，khah早有啥mih恐怖ê代誌發生–leh？Beh按怎解決？咱kám koh會tú–著？台灣轉型正義iáu有真chē代誌無做，beh按怎hâm親chiâⁿ朋友講chiah ê代誌？
民進黨過去chit 8冬完全執政，轉型正義tī法律tek soah hông真失望。Taⁿ新立委、新總統tī 2–月、5–月就任，民進黨雖然總統有tiâu，立法院soah無過半。阮tī chia公開要求新總統賴清德先生，ài堅持轉型正義ê路，che是台灣民主ê基本價值。阮mā要求行政院kap新立委，ài具體安排時間表，趕緊處理轉型正義法案。阮要求下底3層代誌：
第一，新立委ài處理轉型正義ê問題
Beh實踐人權，轉型正義就是重要根基。新立委ài要求ka-tī，lia̍h人權做標準。往過獨裁政權對台灣人民傷害chiok深，ài趕緊立法來要求政府反省、處理chiah ê錯誤ê所在。避免未來台灣人繼續受殖民政權、殖民者迫害，1世人驚hiâⁿ過日。中國國民黨立委koh khah ài面對歷史，m̄ tio̍h ê代誌著ài承認、ài修正，將黨產無應當the̍h–ê lóng交–出-來，「中正紀念堂」chit款殖民政府加害者無應該koh紀念，建築ài轉型têng起，受害者kap遺族chiah thang恢復尊嚴。民進黨立委ài維持關鍵ê力量，繼續支持修正轉型正義法案。民眾黨立委人數相對少，koh khah ài支持相關法案。各黨派beh tī台灣維持民主制度kap台灣主權，著有責任ài維護台灣人ê基本人權。
第二，ài積極處理修改轉型正義法案
轉型正義是政府ê基本責任。舊年9–月，有民間團體計共13 ê，共同發起連署，號做「落實轉型正義法制化，轉型正義五法修法」。內底「促進轉型正義條例全文修正案」chit項是基本母法，要求政府有義務ài處理轉型正義ê khang-khòe，koh規定政府單位有啥mih khang-khòe有責任kap權力來處理。基本母法lia̍h外，「加害者究責專法」、「不義遺址保存專法」、「中正紀念堂管理處組織法修正案」等等chiah ê法案mā lóng m̄知影tang時chiah會處理。過去chiah ê法案tī社會–ni̍h已經有真chē討論ê機會，咱大聲要求行政院kap無kāng黨派ê立委ài趕緊處理，促進台灣共生、和解。
第三，ài完整公開政治檔案
舊年2023年有通過《政治檔案條例》修正案 kap 《國家機密保護法》修正案，今年228著beh來執行。頂1任ê立委值得肯定，m̄ koh mā要求新政府ài繼續koh做。轉型正義法案有繼續修正，是台灣民主化ê資產，mā是民主ê基座，所致，政府安全單位kap行政部門等等請照轉型正義法案來行政，mài koh kā歷史真相掩khàm–起-來，kā殖民威權統治者kap加害者lóng藏藏–起-來。台灣ài beh民主化，著ài面對事實，公開歷史，chiah有可能避免人權koh受壓迫、受傷害，繼續維持自由民主ê社會。
1987年，鄭南榕、陳永興、李勝雄等等chhōa頭發起演講，公開討論chiah ê代誌，舉辦228公義和平運動來紀念，主張講「歷史ài好好á面對，台灣社會chiah會健康」。轉型正義上要緊–ê，就是看待歷史ài真心、ài老實。對228起，經過白色恐怖時期，到解嚴了後，chiah ê khang-chhùi猶原好bē lī，每1 ê台灣人ê生活猶原受影響。M̄ tio̍h ê代誌，著傷ê所在，無好好á面對，bē ka-tī恢復。向望咱台灣人有決心，thang起造健康、民主化ê台灣社會，起造ka-tī ê國家。
【 228.0 誠實的歷史 健康的國家—228七十七周年紀念行動】
誠實的歷史 Sêng-si̍t ê Le̍k-sú
健康的國家 Kiān-khong ê Kok-ka
同齊來行 1947 台灣人醒覺 ê 路
鬥陣疼、做伙惜
天光 hit 工、台灣是新閣獨立 ê 國家
請同齊行出來
歡迎報名（個人 / 團體）參與遊行 ：
https://forms.gle/rXF8fbRcUqJiYhGBA
為方便後續統計和聯絡，請填寫報名表單。
多謝大家，ló͘-la̍t!
今年度ê紀念行動
✦集合時間｜2024/2/24 (拜六) 13:30
✦集合地點｜台北市日新國小集合出發
✦當天服裝｜請著正式/黑色服裝/黑色口罩
路線：
日新國小→天馬茶房→專賣局台北分局→台灣廣播電台→台灣行政長官公署（行政院）
路名詳細版：日新國小→南京西路→延平北路→長安西路→重慶北路→重慶南路→襄陽路→公園路→青島東路→中山南路→行政院
發起單位
鄭南榕基金會．紀念館、玫瑰古蹟-蔡瑞月舞蹈研究社、陳文成博士紀念基金會
合辦單位（持續更新）
台灣基督長老教會、台灣人權促進會、台灣廢除死刑推動聯盟、北區暖暖蛇共學團、社團法人台灣親子共學教育促進會、小民參政歐巴桑聯盟、台中市好民文化行動協會、人權公約施行監督聯盟、社團法人台灣民團協會、北鳥：歌唱革命、香港邊城青年、民間司法改革基金會、財團法人李江却台語文教基金會、新國家· 設計所、臺灣東突厥斯坦協會、台灣原住民族政策協會、台灣民間真相與和解促進會、台灣基進、行動山棧花、財團法人史明教育基金會、社團法人共生青年協會、台南女中台灣文化隊、財團法人賴和文教基金會、靚舞集、蕭靜文舞蹈團、社團法人台灣婦女展業協會、台灣教授協會、財團法人松年長春基金會、社團法人環境法律人協會、台灣228關懷總會、制憲志工團隊、台灣青年反共救國團、海島演劇、台灣芭蕾舞團、社團法人台灣北社、社團法人台灣客社、社團法人台灣社、台灣教師聯盟、台灣永社、打狗台語文協會、台灣原住民族政策協會、人民作主志工團、西藏台灣人權連線
Photo credit：吳亭臻
（文章轉載自：228‧0紀念行動 2024/2/16 臉書文章）
